المشاركات

عرض المشاركات من أغسطس, ٢٠١٤

انا مصـــــــرية

صورة
بقلم : جيهان السنباطى مصرية ,, قوية وراضية دايما بحالى ,, عمرى ما اخلى الحزن يغلبنى ,, أو ينسينى فى يوم حالى ,, ورغم التعب والهلكة ,, تلاقينى على طول لابسة ,, متشيكة بطرحتى وفستانى ,, الدمعة تبقى على خدى ,, واقول لأه ,, دى مش دمعة ,, مين قال كده ,, وابكى على ايه ,, وانا حلوة ومين أدى ,, واللى يقول غير كده ,, أرميه بقبقابى ,, متزينة بحلق طارة ,, وعيونى شاردة ومحتارة ,, شايفة فى عيون الناس كلام ,, وقلوبهم حاسدة ومكارة ,, واقول ايه ,, واعيد ايه ,, خلينى ساكته احسن ,, فى سكوتى اشطر سنارة ,, خليك فى حالك يابن الحلال ,, ده اللى بيقرب منى ,, بيبقى حاله حال ,, ينسى نفسه ,, ينسى أهله ,, وعلاجه من المحال ,, ده انا مصرية ,, قوية وراضية دايما بحالى ,, عمرى ما اخلى الحزن يغلبنى ,, أو ينسينى فى يوم حالى ,,

وأنا وحدى

صورة
بقلم : جيهان السنباطى ============= وأنا وحدى .. بكتب .. بغنى .. بعيش لنفسى ولو لحـــظة ولو الوقت خانى .. بعيش بخيالى الدقيقة ميت ألف لحظة بأمسك قلمى .. واسرح بفكرى .. وأحكى لنفسى قصـــة أنا بطلتها .. والبطل فارس .. على حصانه .. كله جمال ورقة أشوف نفسى ملكة زمانى .. فى عصر تانى غير عصرى لاالشكل شكلى .. ولا اللبس لبسى .. ولاالمكان مكانى بس الأمانى .. بتتحقق .. والعمر اللى راح بيتـــــعاد تانى والقلب من الفرحة بيتنطط .. ومفيش مكان للحزن اللى كوانى لكن فى لحظة .. تغيب الوحدة .. وترجع الدوشة والضيق تضيع منى الفرحة .. حتى النفس يبقى زفير من غير شهيق والأمل فيا يفضل متعلق .. بنهاية قصة صنعها خيالى الرقيق وفى النهاية .. أسيب قلمى .. وأطوى الدفاتر .. وفى عينى بريق

دنيا الأحلام

صورة
بقلم : جيهان السنباطى ================ باب الأحلام مفتوح … ينادى عليا ويبوح … جماله ياخد العين والروح … وإزاى أشوفه ولا أروح … على أعتابه مكتوب مسموح … بالحب … بالشوق من غير … دموع … من غير جروح …  يقول تعالى خد منى الغالى… العالم كله بين إيديك …  خيالك .. عمرك .. كله ملكك … إسرح ولأبعد مكان روح … ولما تحب ترجع … بس تفتح عينيك … هتلاقى نفسك  … فى دنيا الهم والنوح…

ضحكِتك كدابة

صورة
كلمات: جيهان السنباطى    مرسوم على شفايفَك إبتسامة  والعين بتحكى ألف قصة  نص وشك بيرسم ضحكاية  والنص التانى فيه ألف دمعة  عايش ميت وسط الناس  لامشاعر تحركك ولا إحساس  طيب وحنين بس مش ليك  أيدك دايما بالخير ممدودة للناس  جواك أحلام كتير بتتمناها  بس حظك ف الدنيا معاكسك  ماشى فى طريقك باصص أدامك  تلاقى كل الناس ماشية عكسك  ضحكتك كدابة عايزة تتصحح  عشان تحس بيها لازم تتحول  الطيبة مش عيب بس العيب  ف الناس اللى شايفة الطيب أحول  بدل مايسعد نفسه يلاقى نفسه  بيسعد واحد أهبل  ياخد وياخد منك ولايشبعش  وكل ماتديه هيطمع ولاهيبطل

مين يكدب الأول ؟؟

صورة
مين يكدب الأول ؟؟ بقلم : جيهان السنباطى ============= الدنيا حواليا بقيت ورقة .. وكلمة ..وجملة .. وخبر كلام مرصوص فى عامود .. وصورة .. تبكى الحجر ده مقتول .. وده قاتل .. وده شايف .. وده سامــع وده عامل مش شايف .. ولاحاسس .. ولاسامـــع الكدب باين فى عيون الكل .. والنفوس بيطل منها الغل والتشفى فى خلق الله عادة .. ومصمصة الشفايف ع الكل البلوة تحصل فى ثوانى .. والكلام عنها يزيد مايقل وبدل مانطبطب ونداوى .. نضغط ع الجرح لحد مانمل شكل الدم اصبح عادى .. نقطة .. بركة .. مش مهم الاهم انك ع الورق تلاقى .. خبر ينط يزود الهم الكل بيتسابق .. مين يكدب الاول .. مين يكون البادى مين اللى هيكون جملة .. وصورة .. تحرق القلب الهادى مين اللى هينول شرف أول دمعة .. تنزل .. تحيى جراح ماتت مين اللى هيتكرر إسمه .. مع كل خبر .. قتل فينا مشاعر فاتت عينى عليكى يادنيا .. ظلموكى .. لما ربيتى جواكى جنين مايسوى اول مااتشد عوده .. جار عليكى .. إتشفى فيكى .. وأل إيه .. من غير مايدرى وعجبى