إطعن ياولدى

إطعن ياولدى 
وإغرس الطعنات بجسدى 
إطعن وإضحك وغنى 
على أشلاء ألمى ووجعى 
صدقت الغريب وهو عنا بيحكى 
ويقول إنك غريب على أرضى 
وإتفقت معاه على موتى ونهايتى 
نسيت إنك كنت ذرة من ترابى 
وياما داست رجليك على رملى 
نسيت أنى إحتويتك فى حضنى 
ولملمت دمعة حزنك فى كفى 
فكرت ليه فى هدمى وقتلى 
مش حرام تقتل فى قلبك حبى؟ 
إزاى هتغمض عينك ياولدى 
وإنت على أرض غير أرضى 
وإزاى هتحلم وإنت صاحى 
وبأيديك قتلت حلمك وحلمى 
خلينى على فراقك أبكى 
وأقفل على الأحزان رمشى 
الموت مش أول ولا أخر همى 
والطعنة منك مش هتقتل عزمى 
إنت الخاسر وبكرة تجيلى تبكى 
تبوس الأيادى وتطلب عفوى 
ساعتها مش هقول ده ولدى 
اللى يختار غيرى ينساه قلبى 
وإنت إخترت الغربة فلا تنتظرنى 
قريبا سألد غيرك وسيكون هو سندى 
لملم أحلامك وذكرياتك وأمشى 
أكذب وتجمل للاخرين وأترك لى أمرى 
فما عدت أمك ولا أنت عدت ولدى 

--------------

تم النشر فى الجمهورية

http://www.gomhuriaonline.com/main.asp?v_article_id=126236#.Up-dMjqLYN0.twitter