سحر الكلمات

بقلم / جيهان السنباطى =========== أنا منك وإنت منى حتى ملامحك حتة منى ضى عيونك ضحكة شفايفك حتى خصامك بيجننى مهما داريت إحساسك عنى نظرة واحدة من عيونك قادرة تخونك وعنك تفتن لى ومهما عليا كنت قاسى جواك طيبة تخلى القاسى يدوب فى لحظة وبدل البكا ,, تلاقيه يغنى بشوفك فى عيونى ملاك وأشوف نفسى جواك روح واحدة متبعدش عنى اسمع كلامى أنا بلاك نغم حزين قمر أسير وسط الغمام بيستنى لقاك ده أنا منك وإنت منى وبعد المسافات عنك مايشغلنى حتى لو غيبت سنين هترجع تلاقينى فى نفس المكان مستنى

ياناس كفاية بقلم : جيهان السنباطى ============ على أد حالى ,, لابيتى عالى ,, ولافرش بيتى من دهب وفضة أقوم يوماتى ,, أصحّى ولادى ,, وأحضّر لجوزى الشاى واللُقمة شقيانه دايماً ,, باجى على نفسى ,, وأبدى غيرى دايماً على نفسى الأصل طبعى ,, والطيبة وصفى ,, وايدى كريمة الا على نفسى دايما تشوفنى ,, برتب فى بيتى ,, وأطبخ طبيخى ,, وأغسل الهِدمة مش عايزة من بكرة ,, غير بس سُترة ,, ودنيا من غير مشاكل هادية بيقولوا عنى ,, ناسية إنى ,, ست ولازم أتبغدد وأعيش عيشه هنية ويقولوا شوفوا ,,  زمان دى كانت ,, تمشى تتعاجب ولا أجمل صبية دلوقتى كِبرت ,, وضاع جمالها ,,  بس برضه لسه ضياءه فيها واللى يقول ,, سيبوها فى حالها ,, ياريت الزمان أكرمنا بواحدة زييها ياناس كفاية ,, كِتر كلامكم ,, وزاد ملامكم ,, وكل واحد فيه كفاية خليكوا فى حالكم ,,  ماتشوفوا غيركم ,, ده كل باب وراه الف حكاية