سحر الكلمات

رسام الفضيلة بقلم / جيهان السنباطى ======= راسم على وشه الفضيلة وإيده مبتسيبش السِبحة فى الصبح يرتل تراتيله وف ليله يحب العتمة داير وسط الناس يدعى وبصوت عالى يقول الله أنا عبدك ياخالقنى إحمينى من شر الأه ولما تشوف حياته تندهش وتقول إزاى عايش بوشين وش برىء كتكوت ف العش ووش شيطان رجيم بقرنين إزاى يقدر يرسم الفضيلة ومن جواه فاضى ومفترى يعمل كل بلوة وبلوة كبيرة ويقول ربى سترنى عشان بيحبنى صحيح فنان وريشته جنان لاتقول رافايللو ولاحتى دافنشى إرجع لعقلك يا أنسان لاف يوم تنوى التوبة ولاتتقبلشى تم النشر فى: الجمهورية اون لاين شباب النيل مصر الحرة

مبنتعلمش بقلم / جيهان السنباطى ========== لما يبقى الكلام زى السُكات والصبر يبقى جَنين ومات يبقى اللى بينا ملهوش وجود لما فى البعد نعِد العمر بالساعات ونحاول بالعافية نرجع اللى فات يبقى غباء من غير حدود لما منتعلمش و نجرى ورا أوهام لما نستسلم للى يجرحنا وحرجه غارس فى العِضام يبقى العقل غايب والقلب دايب فى قلب ميستاهلش حتى الجحود صدقونى ... النهاردة بس فهمت معنى الحكاية اللى يحب دايما يملك نقطة البداية واللى نحبه فى ايده نقطة النهاية صدقونى ... الموت مش بس نفس ينتهى ولا إسم من الوجود يختفى الموت يعنى قلب يجرحك ولايختشى ...

بنت مصر مش لعبة كلمات: جيهان السنباطى ------------ إوعى تقول مكنش قصدى لما طَاوعك قلبك تجرحنى لما قدِرت تِكشف سَترى و بعت إسمى وعرضى إوعى تنسى إنك جَانى وإن ربك مش هينسانى أكيد حقى هيرجعلى من أهلك من بيتك أكيد عملك هيرجعلك تانى إوعى تصدق دمعتك وإيديك اللى مخبية عملِتك مهما بكيت مش هتلاقى اللى يصدق كدبِتك إعترف إنك قاصد تكسرنى وتِكسر اللى معايا وجَنبى إعترف بإنك بتعاقبنى على حبى ووفائى لبلدى لا.. ياللى كنت إبن بلدى بنت مصر مش لعبة دى بضعفها أقوى منك وإن كنت شايفها هزيلة بقولك إصحى من نومك البنت المصرية لسه صامدة وبكل قوتها هتواجه ظلمك ورينى إنت بقى شطارتك لما بكرة تقابل وجه ربك ============= تم النشر فى الجمهورية اون لاين http://www.gomhuriaonline.com/main.asp?v_article_id=171661#.U5g5kQMvanc.facebook

اللى بينا أصبح هوا بقلم / جيهان السنباطى --------- بكدِب على نفسى وأقول لسه بينا حنين وإن اللى بينا مُستحيل تمحيه السنين وبحاول أصدق كِدبتى وأصبُر على ظُلمه وأدارى عن الناس دمعتى لأجل أحافظ على عِشِّى وعِشِّه وأقول بينا ولاد وعِشرة خليكى يابِت عاقلة أقفى بقوة على رِجلك إستحملى بكرة هتزول الغُمة بكرة هيرجع لك زى زمان مليان بالشوق مليان بالحنان بكرة هييجى يقولك أنا غلطان يتأسف لك ويترجاكى تسامحيه كمان وإستنيته يوم يتغير عشان نقدر نكمَّل لقيت كل يوم بيعدى بيغيرنى أنا والصبر اللى كان جوايا إتحوِّل حتى اللى كان بينا أصبح هوا مش هسامحه ومش هستنى قربه الخيط اللى بينا خلاص إتقطع ولو فاكر إنى مش هستحمل بعده فكَّروه إنى معاه ياما قلبى إتخدع مش هشترى تانى قلب باعنى قلبى غالى محتاج اللى يقدَّره أشترى ليه قلب باعنى وخدعنى مش مهم عندى إنى أخسره من النهارده هعيش حياتى لنفسى فرحى وحزنى ليا وبس واللى إتكسر جوايا هيقوينى مش هستنى حد بيا يحس إوعى تبكى عليه ياعين ميستهلش دمعة على الخد سبيه تايه مكسور حزين اللى زيه مالوش مكان...

ركِّبوا الوشوش ع الوشوش النهاردة حقيقى وبكرة مغشوش وشوش ف رقة العصفورة ووشوش زى الوحوش وش تشوفه تستبشر ووش زى الحجر منقوش وش خفيف الظل ووش زى الديك منفوش بدِّلوا كل يوم وش خبّوا الملامح الأصلية وحطوا الوش ع الوش وكل وش له فايدة مثِّلوا دور الطيبة خلوا الشرير يكش مين يقدر على خلع الوش اللى يقرب يتكهرب وبسرعة أوام يتهش خلوا المسرحية تكمل والمعلوم ف الجيب يتأش اااااه يازمن العجايب معدوم الضمير فيكى يعلا وصاحبه مكانه ف العِش بقينا عايشين وسط وشوش من ربنا مبيخافوش ولو كشفتهم ميتكسفوش ويرموا البلوة عليك عشان تخاف وتكِش

نسيتك ------- بعد ماباعنى جاى يسألنى لسه بحبه ولاخلاص بصيت ف عينه وأنا قلبى وَجِعنى وجوايا بركان أحساس أصرخ فى وشه ولاأهدى ولامردش وأكون باردة ولا أقوله خلاص ... ولا أقوله أيوة نسيتك بعد ماحبيتك حب مقدرتش تحافظ عليه عرفت قيمتى من بعدى عنك وجاى دلوقتى تسأل عليه واثق إنك لما ترجع هتلاقى حضنى مستنيك لاهقولها مات خلاص أيوة مات جوا منى لما قررت بإرادتك تكسر الحلم وتفكر إنى هعيش سجينة فى زنزاتك خليك إنت زى مانت إظلم نفسك وعيش فى حيرتك جوة قلبى خلاص قتلتك حتى صورتك قطعتها والحلم اللى عيشته ف حبك ذكرى برضه كرهتها

مهما كان القلب موجوع هفضل أغنى ومش هستسلم مهما دوِّبت عيونى الدموع برضه هضحك مش راح أسلم هكمل طريقى واليأس ممنوع الصبر عنوانى ومش هتألم هنور طريقى ولو بالشموع وبعزيمتى هوصل ولأخره هكمل حتى لو كان طريقى مقطوع همشى قوية وعينى تتكلم الطريق مفيهوش رجوع زى مابديته لازم يتكمل هيفيد بأيه إحساسى بالخضوع غير كتر الأااااه وجرح مايترمم خللى الأحزان بين الضلوع لا حد يسمع ولامنى يتعلم فى كل العيون كلام مسموع وربك وحده هو اللى بيسلم وأنا سلمتها لله بخشوع وقلبى راضى مش راح يتظلِّم