بحار الملل
بقلم /
جيهان السنباطى
========
أوقات تحس أنك مضايق
ومش عارف من إيه ؟
غرقان فى بحار الملل
محتاج لشط ترسى عليه
بتتمنى تحس البسمة لكن
مش عارف تجيبها منين
جواك حزين ,, غامض ,, إسود ,,
جواك نحيب وأنين
الكلام من على لسانك
تايه والصمت مليان معانى
مش أى حد يفهمه ولا أى حد
هيستحملك وإنت بتعانى
غصب عنك هتلاقى نفسك
وسط جزيرة مفيهاش بشر
جزيرة إنت إخترتها لنفسك
هروب من كل البشر
مش عايز حد يسألك مالك
.. إيه غير حالك؟؟
مش عايز تحس بغربة نفسك
وسط أهلك وناسك
وتفضل تخبى ,, وجواك تِعَبىِّ ,,
ومرة على مرة تنهار
والقوة اللى بترسمها أدام
الناس تكشف ضعف وإنهيار
غرقان فى بحار الملل
محتاج لشط ترسى عليه
بتتمنى تحس البسمة لكن
مش عارف تجيبها منين
جواك حزين ,, غامض ,, إسود ,,
جواك نحيب وأنين
تعليقات
إرسال تعليق