حدث خطأ في هذه الأداة

الاثنين، 18 أغسطس، 2014

وأنا وحدى

بقلم : جيهان السنباطى
=============
وأنا وحدى .. بكتب .. بغنى .. بعيش لنفسى ولو لحـــظة
ولو الوقت خانى .. بعيش بخيالى الدقيقة ميت ألف لحظة
بأمسك قلمى .. واسرح بفكرى .. وأحكى لنفسى قصـــة
أنا بطلتها .. والبطل فارس .. على حصانه .. كله جمال ورقة
أشوف نفسى ملكة زمانى .. فى عصر تانى غير عصرى
لاالشكل شكلى .. ولا اللبس لبسى .. ولاالمكان مكانى
بس الأمانى .. بتتحقق .. والعمر اللى راح بيتـــــعاد تانى
والقلب من الفرحة بيتنطط .. ومفيش مكان للحزن اللى كوانى
لكن فى لحظة .. تغيب الوحدة .. وترجع الدوشة والضيق
تضيع منى الفرحة .. حتى النفس يبقى زفير من غير شهيق
والأمل فيا يفضل متعلق .. بنهاية قصة صنعها خيالى الرقيق
وفى النهاية .. أسيب قلمى .. وأطوى الدفاتر .. وفى عينى بريق

ليست هناك تعليقات:

إرسال تعليق