تحت المطــــــــر
تحت المطر
وف نفس المكان
تاخدنى خطواتى
لذكرى عاشت
سنين جوايا
هنا مشينا
وهناك قعدنا
هنا ضحكنا
وهناك سهرنا
هنا صارحنى بحبه
وهناك صارحته بهوايا
زى ماهو الطريق
بس احنا إتغيرنا
مفاضلش منا فيه
غير عبير إتخنق
نفس الهوا
نفس السما
بس مفيش بريق
ماتت فى عيونا الفرحة
ونروح فين م الوحدة
وهنبكى لإمتى ع اللى راح
ونقول ياريته فضل حبه
بس ياترى
لسه فاكر المكان
ولسه فاكر اللى كان
لسه عنده حنين
ولما بيمر ع الطريق
بيفتكر حبيب زمان
ف الطريق لوحدى ماشية
مش عارفةرايحة ولاجاية
عنيا مش شايفة رجلى
ولاسامعة غير نقط الماية
ف لحظة سمعت صوت بينادينى
صوت يشبه صوت حنينى
سمعته وكملت طريقى
قولت حلم .. يمكن
دموع المطر
بتلاغينى
لكن سمعته تانى بيقرب
واسمى على لسانه بيتردد
وايد بتلمس ايديا بحب
وصوت بيهمس وحشتينى
كنت متأكد
أن البعيد مسيره هيقرب
ااااااااااااااااه يادمعة
مش مكانك دلوقتى ع الخد
سيبيلى الفرحة
بلاش تخلى الحلم يتهد
هيقولى وهقوله
والعين تترجم وتفتن له
اما القلب ده حكايه
دقاته سامعها
الكون ده كله
ياحلمى خليك ليا
اوعى تغيب عنى
لو الطريق طويل عليا
خطى معايا وساعدنى
ياحلمى يا اغلى ماليا
يافرحة عمرى وسنينى
تعليقات
إرسال تعليق